ഗാന്ധിജി മടങ്ങി പോകുന്നു

മുളവടി ആവർത്തിച്ചു
തറയിൽ മുട്ടുന്ന ശബ്ദം
കാതുകളിൽ ചേക്കേറി
രാജ്യം പതിവു പോലെ
പാതിരാ സുക്ഷുപ്തിയിൽ

ആരേയും ഒട്ടും തന്നെ
അലോസരപ്പെടുത്താതെ
അഞ്ഞൂറു രൂപ നോട്ടിൽ
നിന്നും മഹാത്മാ ഗാന്ധി
ഇറങ്ങി, നടന്നു പോകുന്നു
പ്രധാന മന്ത്രിയുടെയും
രാഷ്ട്ര പതിയുടെയും
വസതികൾക്കു മുന്നിലൂടെ
സാമാജികർക്കെല്ലാം
സൗകര്യ പൂർവ്വം
വഴക്കടിയ്ക്കാനായി
കെട്ടിയുയർത്തിയ
മന്ദിരത്തിനു മുന്നിലൂടെ
മുളവടി തറയിൽ മുട്ടിച്ച്
അദ്ദേഹം നടന്നു പോകുന്നു .

പിറന്നാൾ

കൂട്ടുകാരികളുടെ
ജന്മദിന വിശേഷങ്ങളാണ്
അവളുടെ പിറന്നാൾ മോഹങ്ങൾക്ക്
ചിറകു വെച്ചു കൊടുത്തതും
ആകാശം മുട്ടെ പറന്നു
ചെല്ലാൻ കുതിപ്പു പകർന്നതും
പ്രാരബ്ധങ്ങളുടെ
തടസ്സങ്ങളിലൂടെയങ്ങിനെ
അവളുടെ പിറന്നാൾ മോഹങ്ങൾ
ആ,ദിനത്തിൽ ചിറകു വിരിക്കും

പിറന്നാൾ വെറും
സങ്കല്പ സുഷമകൾ മാത്രമെന്നു്
അറിഞ്ഞു കൊണ്ടു് തന്നെയാണവൾ
വീട്ടിൽ ഹാപ്പി ബെർത്തു് ഡേ പാടി
പിറന്നാൾ കേക്കു മുറിച്ചെന്നും
കെഎഫ്സി വാങ്ങി
പിറന്നാൾ പാർട്ടി കൊഴുപ്പിച്ചെന്നും
സഖികളോടു സവിസ്താരം പറഞ്ഞതു് .
ദൈവകുമാരന്റെ പിറന്നാൾ മാത്രം
അവളുടെ വീട്ടിൽ ആഘോഷിക്കും
അതു് ഒരു വർഷമായി നടത്തുന്ന
സന്നാഹത്തിലൂടെയാണു്
സ്വന്തം പിറന്നാൾ കള്ളങ്ങൾക്ക്
തിരുകുമാരന്റെ പിറന്നാളിലൂടെയുള്ള
ഒരു ശുദ്ധീകരണം കൂടിയുമാണു്
എല്ലാമറിയാം അവളുടെയമ്മക്ക്
പിറന്നാളിനു നല്കാനാകാത്ത
പുത്തനുടുപ്പു് ദൈവകുമാരന്റെ പിറന്നാൾ
സമുജ്ജ്വലമാഘോഷിക്കാൻ
അമ്മയവൾക്കു സമ്മാനിക്കും
ദൈവത്തിന്റെ പിറന്നാൾ
അവൾ സമൃദ്ധമായി ആഘോഷിക്കട്ടെ .