ഞാൻ കാത്തിരിക്കുന്നു
സൂര്യനും ചന്ദ്രനും എന്നും
എന്റെ ആകാശത്തിനു
മീതെ കൂടെ കടന്നു പോകും
ഋതുക്കളും വർഷങ്ങളും
വന്നു പോകുന്നു
ഞാൻ കാത്തിരിക്കുന്നു
ആഹ്ളാദ സല്ലാപങ്ങളുടെ
ശബ്ദഘോഷങ്ങൾ
എന്റെ അതിരുകളിൽ
നിശബ്ദരായി തളർന്നു വീണു
ഒരു മിന്നായം പോലെ
വന്നു പോയ പ്രണയിനിയുടെ
കുളിപ്പിന്നൽ കെട്ടിലെ
തുളസി ദളം അകലെയായി
അടർന്നു വീണു കിടക്കുന്നു
കൈവെള്ളയിൽ നിന്നും
ഊർന്നു വീണു മറഞ്ഞ
സാധിതപ്രായമാകേണ്ട
പ്രതീക്ഷകളുടെ ചാരത്തിലൂടെ
ഒരു നിലവിളി
എന്നെ തേടി വരുന്നു
ഞാൻ കൈകൾ നീട്ടി
നിലവിളിയെ സ്വീകരിച്ചു
