നിശക്കും , നിലാവിനുമിടയിൽ
പൂർണ്ണത ഞാനിന്നറിഞ്ഞു
ഞരമ്പുകളിൽ പടർന്നു പടരുന്ന
ചെഞ്ചോരയിരമ്പലിന്നപ്പോൾ
ആയിരം കടലിൻ രുദ്രതാളം.
ശിലയുടെ കാഠിന്യമടർന്നു വീഴും
മെയ്യഴകിനുഷ്ണജലപ്രവാഹം
ഇട കലർന്നിഴുകി, നിറങ്ങളുടെ
ശ്വേത വർണ്ണ പരിണാമം
ഗുപ്ത രാഗങ്ങളീണമിട്ട മർമ്മരം
ഭഞ്ജിക്കുന്ന ലാസ്യ മൌനങ്ങൾ
മുക്ത മോഹം മൊത്തിക്കുടിക്കും
പ്രമഥ സ്വപ്ന ദ്രാക്ഷ രസം
ധന്യതയിൽ വന്യാഭിലാഷം
പടം പൊഴിച്ചിഴയുന്ന തല്പം
അതിലുന്മാദത്തിൻ കനലുകൾ
വിരിച്ചു ,ഞാനൊന്നുറങ്ങീടട്ടെ.
