ഉറക്കം തേടി

കടലെത്രയൊഴുക്കിയാലുമണയാത്ത
ഉള്ളിലെ കനലിലെരിയുന്ന വേദന
വിടപറഞ്ഞു പോകും സൗഹൃദങ്ങൾ
വലിച്ചെറിഞ്ഞിടുന്ന കൊടും വേദന
പാറിപ്പറക്കാൻ വെമ്പിടും ജീവിത
പ്രതീക്ഷകൾ, ചിറകു തകർന്നു താഴെ
വീഴുമ്പോളറിയും നഷ്ട ബോധത്തിൻ
കരിനിഴലു പടർന്നിടും ദുസ്സഹ വേദന.
ചിന്തകളിൽ ഭാവനയിൽ, ചിത്തമലഞ്ഞു
കല്പനാ തത്വമോടെ കുറിച്ചതൊക്കെയും
മാറാല നിറഞ്ഞ പാഴ് ഗൃഹമായി മാറിയ
നിസ്സാഹയതയുടെ ഊഷര വേദന
വേദനകൾ പുതച്ചു ഞാൻ കിടക്കുന്നു
ഉറക്കമേ നീയെന്തേ ഉറങ്ങിപ്പോയോ?

സഹോദരി നിനക്കായി

പുസ്തകം തുറന്നു
നോക്കുമ്പോൾ
കാണുന്നതു
അവന്റെ മുഖമാണു്
സ്വപ്നത്തിൽ
വന്നെത്തുന്നതും
അവന്റെ മുഖം മാത്രം
അത്രയ്ക്കിഷ്ടവും
പ്രിയതരവുമായതിനാൽ;
പകൽകിനാവും ,
മധുരസ്വപ്നവും
അവനെക്കുറിച്ചോർത്തു
കാണുന്നതല്ല ,
അതെല്ലാം
പേക്കിനാവുകൾ .

ഒരിക്കൽ
അവനെയെത്രമാത്രം
ഇഷ്ടമായിരുന്നു ,
ജീവനായിരുന്നു
അവൻ വിളിച്ചപ്പോൾ
പ്രപഞ്ചത്തിന്റെ
അതിരുകൾക്കപ്പുറം
എല്ലാമുപേക്ഷിച്ചു
യാത്രയാകൻ
തയ്യാറായതും
അതു കൊണ്ടായിരുന്നു
എന്നാൽ അവനെ
ഇന്നെനിക്കു
പേടിയാണു് ,
പേടിസ്വപ്നങ്ങളിൽ
അവന്റെ
ബീഭത്സ മുഖം തെളിയുന്നു
പല്ലുകളും നഖങ്ങളും
തെളിയുന്നു
മുഷിഞ്ഞ വിയർപ്പു
ഗന്ധത്തിന്റെ
അസഹനീയതയും
വയ്യ !അതൊന്നും
ഓർക്കാനാവുന്നില്ല
എന്നാലുമെഴുതിപ്പോയി
നിനക്കായി
സഹോദരി നിനക്കു വേണ്ടി .