ഇനിയിഴയാം നമുക്കു പാമ്പുകളായി
ചുറ്റിപ്പിണഞ്ഞടുത്തടുത്തു ചേർന്നു
സ്വപ്നങ്ങളിലെ മഴവില്ലതിൽ മെല്ലെ
നമ്മുടെ നാഗ മാണിക്യങ്ങളുതിർത്തിടാം
പിരിയാതെയങ്ങിനെയതിവേഗം നമുക്കു
കാലത്തെ കടന്നു കടന്നിഴഞ്ഞു പോകാം ,
ഒരു ശംഖു പോൽ ചുരുങ്ങിയുള്ളിന്റെയു -
ള്ളിൽ പ്രണയ കാഹളത്തെ , ധ്വനി
തെറ്റാതെയൊരുക്കി വെച്ചു , ബധിരന്റെ
കർണ്ണങ്ങളെ കാത്തു കാത്തു കിടക്കാം
നമ്മുടെ വിഷപല്ലുകൾ പരസ്പരം
മേനിയിലാഴ്ന്നിറങ്ങിയ സൂക്ഷിരങ്ങ -
ളിലാസക്തികളിനി കൂടൊരുക്കട്ടെ
ഭീതിതമാം സീല്ക്കാരങ്ങളിൽ തുളഞ്ഞു
പിടഞ്ഞു കപട സദാചാരം ചോര
ഛർദ്ദിച്ചു മരണം തേടുമ്പോൾ, പത്തി
അടിച്ചു തകർക്കാനെത്തിയ ദുർവാസന -
കളുടെ കൂട്ട നിലവിളികളെ , താളമാക്കി -
യുയർന്നു പൊങ്ങി നമുക്കു സർപ്പ
നൃത്തമാടാം.
മകുടിയുടെ ക്ഷണ ചലനങ്ങളില്ലാതെ
അതിൻ കാതു തുളയ്ക്കുന്ന കൂക്കലില്ലാതെ
സദാചാര ഭടന്മാരെ ചുറ്റി നിറുത്തിയന -
സ്യൂതമാടിത്തിമിർത്തിടും നമ്മളൊന്നായി
നമ്മൾ പൊഴിച്ച പടങ്ങളിൽ നിന്നുമപ്പോളാ -
യിരം നാഗങ്ങളുയർത്തെണീക്കട്ടെ .
സര്‍പ്പസൌന്ദര്യനൃത്തം
ReplyDeleteമനോഹരമെന്നു പറയുമ്പോഴും പേടിപ്പെടുത്തുന്ന വാക്കുകള്‍ ..
ReplyDeleteആന്തരീകമായ താളം കവിതയെ ശ്രദ്ധേയമാക്കും.
ReplyDeleteപൊഴിച്ച പടങ്ങളിൽ നിന്നൊരിക്കലും നാഗങ്ങളുയിർക്കില്ലെങ്കിലും ഈ നാഗനൃത്തം കൊള്ളാം!
ReplyDeleteഅഭിനന്ദനങ്ങൾ!
അഭിപ്രായമറിയിച്ച എല്ലാ സുഹൃത്തുക്കൾക്കും
ReplyDeleteനന്ദി